MELOTE, Pellis ovina, ex Græco μηλωτή, a μῆλον, ovis. Glossæ vett. Pellis lanata, μηλωτή, ἀρναϰίς. Eædem : Μηλωτή, pellis. Adde Hesychium in μῆλα. Glossæ MSS. Reg. : Μηλόνομος, ὁ τὰ πρόϐατα νεμων, ὅθεν ϰαὶ τὰ δέρματα, μηλωτάρια. Eucherius :

Melote, in Regum libro, pellis simplex qua Monachi Ægyptii etiam nunc utuntur, ex uno latere dependens.

Glossæ Lat. MSS. Regiæ : Melotes, pellis sordida, vel simplex, ex uno latere pendens, qua Monachi utuntur. Papias : Melotes, pelles ovium sordidæ. Melota, lanuta. Glossæ Ælfrici : Melotes vel pera, gæten, vel broccen rocc, i. hircinus vel fractus roccus. Jo. de Janua :

Melota, quædam vestis de pilis vel pellibus illius animalis (Melotæ) facta, a collo pendens usque ad lumbos, qua Monachi utuntur, et iste habitus est, necessarius proprie ad operis exercitium : eadem et pera, ut dicunt.

Gl. Lat. Gall. Sangerm. : Melota, une robe faite de paulz, ou la piau du taixon qui va jusques aux reins, ou robe aspre de chamois. Eliæ Melotes, apud Hieronymum et Paulinum Epist. 36. Cassianus lib. 1. cap. 8. de Monachis Ægyptiis :

Ultimus habitus eorum est pellis caprina, quæ Melotes vel pera appellatur.

Sanctus Hieronymus in Præfat. ad Regulam S. Pachomii n. 4 :

Caprinam, quam Melotem vocant.

Ruffinus de Vitis Patrum cap. 9 :

Melotem, quæ est caprina, pellis. Melotes pellicea,

in Regula S. Isidori cap. 13. Vita S. Aigulfi Abbatis Lirinensis :

Super quam (feminam) B. Aigulfi Melotem imponentes, quasi somno evigilans, coram omnibus surrexit.

Vita MS. S. Mauri Abbat. :

Vidi Melotam, dicens, super æquora notam.

Vita S. Fructuosi Archiep. Bracar. n. 4 :

Melotem ex caprinis pellibus indutus.

S. Eulogius lib. 1. Memorial. SS. de Monachis :

Qui illico relictis urbibus, et his quæ mundanis hærent actibus, avida rapiendi regnum Dei cupidine flagrantes, circumierunt in Melotis et pellibus caprinis, egentes, angustiis afflicti. Melotem

etiam S. Benedicto tribuit Gregor. M. lib. 2. Dial. cap. 7. et ea caput operuisse indicat, quod et affirmat Theodemarus Abbas in Epist. ad Carolum M. unde conficit Haeftenus idem esse cum cuculla, quod præterea firmat ex ordine Romano. Sed quod ait idem Theodemarus et Joan. Hierosolymit. de Instit. Monach. cap. 38. Melotem ita dictam, quod ex pelle illius animantis facta esset, quod melos Græci, Latini taxum vocant, jure ab omnibus improbatur ; quam sententiam attigit etiam Papias : et ex eo Ugutio, ubi de Melote :

Est vero propria ad operis exercitium, fiebat autem prius de pelliculis Melonum, ut quidam existimant, unde et Melotum dicta.

Idem :

Melota et pellibus caprinis esse dicitur, ex una vero parte dependens. Alii dicunt quod ex pellibus asperi taxi, qui Melius dicitur, fiat, unde Melota vocatur : qua utuntur Monachi in Ægypto propter asperitatem. Μηλωτὰς

Græci pariter Monachis non semel adscribunt, præsertim Ægyptiacis, ut S. Athanasius in Vita S. Antonii pag. 120. et Palladius in Histor. Lausiaca cap. 38. 48. 70. 83. 88. Idem sive alius Palladius in Vita Chrysost. pag. 57. Editionis Bigotianæ :

Λαϐόντες αὐτῶν τὰς μηλωτὰς, etc.

Μηλωτάρια aliis dicuntur. Gloss. MSS. Regiæ Cod. 1673 : Τὰ δέρματα, μηλοτάρια. Vita S. Nili Junior. pag. 163 :

Ἀπάραντες σύν μηλωταρίοις ϰαὶ περιϐολαίοις, etc.

Vide Isid. Orig. sect. 19. lib. 19. cap. 24. et Rosweidum ad Paulinum.