MERIDIANA, Somnus meridianus, Sidonio lib. 1. Ep. 2. ϓπνὸς ἀμφὶ ἡμέραν μέσην, Procopio lib. 1. de Bello Vand. cap. 2. qui Monachis, si non præscribitur, saltem permittitur in Regula S. Benedicti cap. 48. Meridie pausare, in Capitulari Aquisgran. ann. 817. cap. 17. Meridianam pausare, in Libro Ordinis S. Victoris Parisiensis MS. cap. 17. 22. 35. Ibidem cap. 37 :

In æstate hora meridiana potest qui vult in dormitorio legere ; sed cavere debet, ne in reversione filiorum strepitum faciat. In illa hora debent Fratres vestiti jacere, et cavere debent ne vel pedes extra lectum extendant, vel in ipso lecto competenter nudi appareant.

Adde Usus antiq. Ordin. Cisterciensis cap. 84. Regulæ monialium B. Mariæ de Sopewel, in agro Herfordensi in Anglia :

Et en esté en temps de la Meriene soient les hus de le parlour et de la gardein, et les fenestres devers la cuisine clos, et ne soient pas ouvert tant que home soune à houre de None, qui sera chantée apres la Meriene. Meridianæ

autem incipiant in Dominica Ramis palmarum, ut est in consuetudinibus Floriac. pag. 396.

a die Iduum Maiarum usque in diem Iduum Septembrium

, in Regula Pauli et Stephani Abbatum cap. 11. Has Kalendis Octobris finiri annotat Lanfrancus in Decretis Ord. S. Bened. cap. 1. sect. 1. et 4. et Bernardus Mon. in Ord. Cluniac. part. 2. cap. 31 :

In hac die (pridie Calen. Octobris) ultimum vale Meridiana suscipit et propinatio aquæ in refectorio. In crastino si fuerit dies Dominica, nullatenus est agenda Meridiana, cum ipso die Calendæ Octobris habeantur, in quibus certissime constat eandem Meridianam dimitti.