MIGMA, Palea minuta, vel tritura frumento permixta, in Gloss. Lat. MS. Reg. Cod. 1013. Eadem habet Ugutio, hæcque subdit : Vel dicitur commixtura, vel confectura saponis, vel unguenti alicujus ad abluendum. Papias : Migma, Hebræum est, id est, mixtura, palea minuta, vel tritura frumento permixta. Gloss. Lat. Gall. : Migma, Orge en paille. Aliud Gloss. MS. ad Alexandrum Iatrosophist. lib. 1. Passion. : Migma est squinantum, palea camelorum. Jo. de Janua et Mamotrectus :

Migma, atis, ordeum cum palea.

Isa. 30 :

Et pulli asinorum qui operantur terram, commixtum Migma comedent, sicut in area ventilatum est.

Ubi Græc. Edit. :

Φάγονται ἄχυρα ἀναπεποιημένα ἐν ϰριθῇ λελιϰμημένῃ.

Hist. Translat. S. Guthlaci n. 17 :

Porcum... siliquis, et cossis, et Migmate impinguaverat.

Formulæ veteres Alsaticæ apud Eccardum ad calcem Pactus Leg. Sal. pag. 244 :

Tolle de xii. censariis singulas ovas (i. oves) et da illis quotidie sal et ventilamina et commixtum Migma, ut tunc bonæ sint. Tolle unum porcum... et da illi quotidie sufficienter de sigila et hordeo, et inebria illum mixtura furfurum seu farinæ.

Unde Migma ex variis granis, puta vicia, hordeo, avena simul permixtis constitisse colligitur ; a Græco fortea μίγνυμι, Misceo. Smigmator, in Miraculis B. Stanislai Canon. Regul. n. 49.