1. MINUTA, Moneta minutissima, quam Græci λεπτὸν vocabant, de quo multa Scaliger et alii qui de re nummaria scripserunt. Aimoinus lib. 3. de Miracul. S. Benedicti cap. 3 :

Desiderio accensus est adeundi Matris Christi aulam,... quam introgressus, Minutam sibi a Vicario ejusdem viri Ermenfredo nomine, obtentu transmissam eleemosynæ, altario... superponere cupiens, sensit suos resolvi nervos.

Tabul. Celsinianense :

Et debet in mense Maii multonem 1. cum lana, et 1. agnum, ad messes 1. sextarium de silica, et alium de civada, ad vindemias carrigium, aut 2. sol. per porcum, et pascuage, et per pastum 13. den.... et Minutam de Poies, et 1. parem.

Ubi Minuta de Poies, idem valet quod Pogensis, seu moneta Podiensis. Vide in Moneta Baronum. Tabul. Dervens. Monast. :

Opus vero castelli semel in anno fiet una hebdomada Martii, et non in alio mense : et si opus non fuerit, pro redemptione operis sex denarios de mansu vestito, de dimidio tres, de quarta parte mansi tres Minutas.

Ita denarius binis minutis constitit, atque adeo idem quod mallia. Tabular. Saviniac. :

Debet septem denarios et unam Minutam de censu. Minuta Alfonsina,

in Charta ann. 1362. ex Archivis S. Vict. Massil. Vide Massiliensis moneta in Moneta Baronum. Glossar. Gall. Lat. ex Cod. reg. 7684 : Minutum, maille, demi denier. Joan. de Janua :

Minutum, quoddam pondus, scilicet media pars quadrantis, unde pauper vidua misit duo Minuta, id est, quadrantem.

2. MINUTA, Italis quælibet grana præter frumentum. Memoriale Potestatum Regiens. ad ann. 1282. apud Murator. tom. 8. col. 1152 :

Non fuit isto anno plenitudo annuæ messis quantum ad frumentum ; sed quantum ad eas segetes quas agricolæ Minuta appellant, maxima fertilitas fuit, scilicet de panico, de milio, de milica, de faxiolis et de rapis.

3. MINUTA, Scriptum primarium, Gall. Minute. Burcard. Argent. pag. 41 :

Lectæ sunt plures Minutæ brevium per ipsum, ut dicebatur, sine scitu et voluntate S. D. N. Papæ, expeditorum.

Vide supra Machæra, ubi Minuta, forte pro Minata, et Minuare 2.