MITADENGA Calcina, Calcis species. Stat. Bonon. ann. 1250-67. tom. II. pag. 548 :

Et quod vj. clavige lapidee fiant cum bona Calcina Mitadenga ;

- et tom. II. pag. 582 :

Et fiat (claviga) de bona Calcina Mitadenga, et de bonis lapidibus coctis ;

- et tom. II. pag. 642 :

Statuimus et ordinamus quod dictus pons debeat volvi, et fieri de bonis lapidibus et bona Calcina Mitadenga.

Nescio an per analogiam hæc vox accipienda sit eodem sensu, quo infra Mitadenquum bladum i. e. Miscellum frumentum ; quo sensu verba Calcina Mitadenga responderent aliis Malta Calcina, quæ occurrunt passim in eisdem Statutis, ut e. g. tom. II. pag. 345 :

Quod una claviga fieri debeat murata undique de bona Malta Calcina ;

- et tom. II. pag. 410 :

Et homines Savigni teneantur facere ibi aliam portam, et dictum murum et portas de bona Malta Calcina ;

- et tom. II. pag. 624 :

Statuimus et ordinamus quod duo ponticelli .... fiant de bona Malta Calcina ;....

et per pleonasmum forsan utraque locutio perhibetur conjuncta in tom. II. pag. 625 :

Et hoc debeat fieri de bonis lapidibus et de bona Malta Calcina Mitadenga.

Fr.