Modiatio, Præstatio pro quolibet modio vini. Charta Richardi Reg. Angl. ann. 1195. apud Marten. tom. 1. Ampliss. Collect. col. 1012 :

Trecentos modios vini percipiendos singulis annis in Modiatione nostra Rotomagensi per integra dolia, sicut ea recipere solemus in Modiatione nostra.

Charta Henrici Regis Angliæ filii Mathildis, pro Ecclesia Pratensi, ex Regesto Normannico sign. P. in Camera Comput. Paris. fol. 24 :

Concedo eis in perpetuam eleemosynam 3. masuras terræ quietas de omni censu et consuetudine, et omni alia re, excepta sola Modiatione mea de vino.

Alia Odonis Archiepiscopi Rotomag. ann. 1266. ibid. :

Terræ arabiles, vineæ, Modiationes vini, prata, nemora, warennæ, etc.

Charta Johannis Episcopi Carnotensis ann. 1178. in Tabulario Drocensi fol. 33 :

Adducent quoque eandem Modiationem Monachi de Brolio, etc.

Monasticum Anglic. tom. 2. pag. 994 :

Reddendo sine contradictione sex modios de Modiatione de Waeneio.

Pag. 997 :

Decima Modiationis

de Rotomago. Pag. 1002 :

Et in civitate Rotomagensi quietantiam de teloneo, et de Modiatione, et de aliis omnibus consuetudinibus.

Charta Communiæ Rotomag. ann. 1207 :

Modiationem tamen nostram de vino Rotomagensi reddent nobis, præterquam de vino quod eis datum fuerit ad potum suum, quod nullo modo vendere poterunt, quin inde reddant Modiationem.

Modiatio, Pensitatio frumentaria pro quolibet modio annonæ. Charta ann. 1191. in Tabular. S. Vincentii Cenoman. :

Controversia inter monachos S. Vincentii et personam ecclesiæ de Reneio, super Modiatione ecclesiæ de Soona. Asserebat Robertus de Guereme persona de Reneio quod de Modiatione ecclesiæ de Soona duos modios annuatim habere debebat. Monachi, quod prædictus Robertus de Modiatione prædicta non debebat accipere nisi tantum xviii. sextarios, asserebant. Statuimus quod dictus Robertus duos modios singulis annis haberet de Modiatione ecclesiæ de Soona, scilicet vii. sextarios frumenti vii. sextarios et minam de mestel, vi. sextarios et minam hordei, iv. sextarios avenæ.

Idem Tabular. fol. 98 :

Et si forte personæ ecclesiarum quæ Modiationem habent in decimis monachorum S. Vincentii, aliquid de leguminibus reclamaverint ; monachi S. Vincentii eis super hoc satisfacere non tenebuntur.

Tabular. Abbatiæ de Strata :

Monachi singulis annis reddent eis octo sextarios Modiationis, quatuor annonæ et quatuor avenæ ad mensuram Drocensem.

Modiaticum, Idem quod Modiatio. In Capitulari Sicardi Principis Beneventani ann. 836. cap. 34. est de Modiatico : cap. 35. de responsatico et Modiatico. Charta Rogerii Regis Siciliæ ann. 1137. apud Ughell. tom. 7. pag. 564 :

Ut deinceps nec Salernitani, nec eorum homines pro Mediatico aliquid persolvant, sed semper ab hac conditione liberi et absoluti permaneant.

Ubi perperam editum mediatico. Adde præceptum Pippini Reg. ann. 831. apud Baluz. in Append. ad Capitular. col. 1431.

Modiagium, Idem quod Modiaticum. Tabular. Prioratus S. Vincentii Laudunensis, ann. 1274 :

Recognoverunt unum modium ad mensuram S. Quintini, qualiter solvitur in Modiagio Ecclesiæ S. Vincentii.

Modagium, Eadem notione. Charta ann. 1203. in Tabular. Crisenon. :

Ego Acelinus de Merriaco notum facio quod Regina mater mea... donavit Ecclesiæ B. Mariæ de Crisenone.... Modagium terræ meæ de Lissi.

Modiare, Modiationem percipere. Tabularium Episcopatus Autissiod. :

Roagium et plaintagium sunt Comitis, Episcopi, et Vicecomitis, et in hoc roagio et plaintagio Comes 1. den. Episc. 1. Vicecomes 1. obol. percipiunt ; Clerici, Milites, Religiosi non debent roagium, plaintagium, nec minagium, nisi Modiant. Si vero Modiant, debent de modio unum den.

Modiatio Capitalis. Vetus Inquesta in Regesto Philippi Augusti Regis Franc. Herouvalliano fol. 171 :

Quicunque vero habeat capitales Modiationes, sive Miles, sive alius, ipse habet venditiones et justitiam.