MOJATICUM, Idem quod Modiaticum, ab Ital. Moggio, modius, Pensitatio frumentaria pro quolibet modio annonæ. Vide in Modiatio 1. Charta ann. 1183. in Access. ad Hist. Cassin. part. 1. pag. 382. col. 1 :

Qui aliquo titulo habuerit res ipsas, non tenetur inde facere aliud servitium vel Mojaticum reddere.... Servitium aliquod vel Mojaticum non quæratur a filio, vivente patre. Verumtamen mortuo patre, faciat mater servitium et reddat Mojaticum.

Vim vocis apertius explicat alia Charta ibid. col. 2 :

Universi habitatores castri Pedemontis et villæ, tam ratione municipali, quam ratione bonorum quæ possident,.... tenentur solvere et reddere annuatim monasterio Cassinensi de grano tumulum unum, et de ordeo tumulum unum, nomine redditus sive Mojatici.