MONTATICUM, Idem, ut mihi videtur, quod Montagium supra, in Charta Karlomanni Regis Franc. ann. circ. 880. in Append. Marcæ Hispan. col. 812. Idem sonat quod Montasgo Academicis Hispanis, Vectigal scilicet pro gregum in montana transmeatione. Charta Aldef. reg. Castel. ann. 1173. inter Probat. tom. 1. Annal. Præmonst. col. 93 :

Dono ut omnes vestri ganados per omne regnum meum secura et absque omni inquietatione, exactione et Montatico libera habeant pascua.

Vide infra Montitium. Charta Raimundi Comitis et Urracæ filiæ Adefonsi Regis, uxoris, æræ 1140 :

Et adhuc damus vobis ex omni tertia parte Salamantinæ civitatis census, quæ in nostra parte evenerit, ut tertia inde pars sit vestra in quocunque loco, vel quolibet modo eam reperire poteritis, tam de portatico, quam etiam de Montatico, vel de calumniis, aut de facinore, vel aliquo reatu, qui in prædicta urbe contigerit, etc.

Alia Adefonsi, ejusdem Raimundi filii, æræ 1164 :

Item ut ex omnibus reditibus ejusdem civitatis ubicunque possent inveniri, tam de Montatico, quam de portatico, de quinta, de moneta, de calumniis, vel homicidiis tertiam partem, et de aceniis et piscariis, etc.

Fori Alcaçonenses :

Omnes qui quæsierint pausar cum suo ganado in termino de S. Maria des Alcaçonas, prendant de illis Montadigo de grege das oves, 4. carnarios, et de busto das vacas, una vaca. Isto Montadigo est de Concilio.

Supra :

Ganado de Alcaçonas non sit Montado in nulla terra.