MUNDIBURDUS, Glossarium mediae et infimae latinitatis, Du Cange et al.

MUNDIBURDUS, Patronus, defensor, tutor : vox ejusdem originis ac mundius, Anglo-Saxonibus mund-bora, Kiliano mond-boor, mond-baer, et momboor.

Vide Grimm. Antiq. Jur. Germ. pag. 465. Graff. Thes. Ling. Franc. tom. 3. col. 147. voce Muntporo. Ridicule porro Ugutio, et ex eo Will. Brito in Vocabular. MS. et auctor Mamotrecti :

Mundus muliebris dicitur apparatus ad ornatum mulieris,..... unde et ministros talium Mundiburdos vocamus.

Charta Rodulphi Arch. Bitur. ann. 855. in Tabul. Bellilocensi Ch. 14 :

Ut pro voto et arbitrio sui quem tutorem et Mundiburdum habere voluerint,... eis concedatur facultas eligendi.

Alia Friderici I. Imper. ann. 1171 :

Memoratus Episcopus oppignoratum sibi beneficium,... in manum nostram reportavit, nosque illud petitione et assensu ejus de manu propria in manum Henrici ejusdem Ecclesiæ Præpositi et Ægidii Comitis de Durachio, qui traditionis hujus Advocatus et Mundiburdus institutus est,.... libere et absolute tradidimus.

Burchardus Wormaciensis in Lege Familiæ :

Si quis eorum domum alterius cum armata manu introierit, et filiam ejus vi rapuerit, cuncta vestimenta quibus tunc induta fuerat, quando rapta est, singulariter in triplum patri ejus, vel Mundiburdo restituat.

les Bénédictins de St. Maur, 1733–1736.

◊ Nostris Mainbourg, eadem notione. Confœderatio inter Carolum VIII. Reg. Franc. et Maximilianum I. Reg. Rom. ann. 1495 :

Item que les Comtez de Bourgogne, Artois, etc. seront rendus au Roy des Romains comme pere et Mainbourg de mondit Seigneur l'Archiduc.

Germanis Mompar, Monbaer, etc. Vide Haltaus. Glossar. German. col. 1373. voce Mundburd.

P. Carpentier, 1766.

Mundiburgus, ut Mundiburdus, Tutor. Charta Bern. episc. Hildeshem. apud Leuckfeld. in Antiq. Walckenried. part. 1. cap. 10. § 6 :

Consensu et adstipulatione fratris sui Bodonis legitimi Mundiburgi et hæredis.

les Bénédictins de St. Maur, 1733–1736.

Munburdus, Eodem significatu, in Præcepto Rodulphi Reg. Franc. ann. 930. apud Baluz. Hist. Tutel. col. 328 :

Quo decedente, qualem communiter voluerint Munburdum et causedicum habeant.

les Bénédictins de St. Maur, 1733–1736.

Mundeboro, Idem qui Mundiburdus. Charta Chlodovæi III. ann. 693. apud Felibian. Histor. Sandionys. pag. xiv :

Ipsi Amalbercthus nec venissit ad placitum, nec ipso Mundeborone suo inlust. viro Ermechario.

Mundibordis, Eadem notione, in Charta apud Willelmum Hedam in Bernulfo Episcopo Traject. 20 :

Mundibordem vero vel defensorem alibi non inquiramus, nisi ad supradicti Sancti altare, ad defendendum scilicet, etc.

Mundeburdis, et Mundiburdis, Defensio, tutela, in Leg. Rip. tit. 35. § 3. tit. 58. § 13. in Capitul. 1. Caroli M. ann. 802. cap. 40. in Capit. 3. ann. 813. cap. 13. in Capitul. 1. incerti anni Caroli M. cap. 54. in Concil. Meld. ann. 845. cap. 41. Marculf. lib. 1. form. 24 :

Et sub Mundeburde vel defensione illustris viri illius Majoris domus nostri..... quietus debeat residere.

Testam. Karileffi ann. 14. Childeberti apud Mabill. tom. 3. Analect. pag. 81 :

Ipsi prædicto Pontifici domno Innocenti tradere cupiebam, sub cujus Mundiburde vel defensione tam ego, quam et ipsæ res sive homines ibidem degentes, futuris temporibus esse meruissemus.

Charta Caroli Martelli apud Serrarium lib. 3. Rerum Moguntinarum pag. 470 :

Cum nostro amore, vel sub nostro Mundeburde et defensione quietus et conservatus esse debeat.

Capit. Caroli Cal. tit. 26. 27 :

Ut Ecclesiæ...... talem Mundeburdem et honorem habeant, sicut tempore antecessorum nostrorum habuerunt.

Et tit. 33 :

Mundeburdem autem ad defensionem Rom. Ecclesiæ pariter conservabimus.

Adde Tradit. Fuld. lib. 1. trad. 39. Mainbournie, in Edicto Philippi Pulcri ann. 1308. tom. 1. Ordinat. Reg. Franc. pag. 459 :

Commandons quant as vivres, que nous, la Royne nostre compaigne, quant nous l'aurons, nos effans estans avec nous, en nostre Mainbournie.

les Bénédictins de St. Maur, 1733–1736.

Mondeburdis, Eodem significatu, in Præcepto Caroli C. ex Tabular. Compend. :

Volumus pariterque jubemus ut sub ea lege qua res fisci nostri jugiter maneant, atque sub eo Mondeburde et defensione tueantur ac defendantur et sub ea tuitione imperiali consistant qua cœnobia.

Mundeburdum, Eadem notione. Concilium Meldense cap. 41 :

Causa defensionis et Mundeburdi.

Charta Pipini Regis Aquitaniæ apud Beslium :

Sub nostro Mundeburdo vel immunitatis tuitione.

Capitul. 4. Caroli M. ann. 806 :

Ut viduæ et orphani et minus potentes sub Dei defensione et nostro Mundeburdo pacem habeant.

Adde Diploma Caroli Simplicis Reg. Franc. sæc. 5. Bened. pag. 8. et Odonis Reg. ann. 890. inter Probat. tom. 2. Hist. Occit. col. 25.

Mandeburda. Charta Ludovici Imper. ann. 815. apud Meurissium in Hist. Episc. Metensium :

Deprecans ut ipsam precariam quam a supramemorato Abbate Optario acceperat, per nostram Mandeburdam et licentiam diebus vitæ suæ, sicut inter eos convenerat, habere potuisset.

les Bénédictins de St. Maur, 1733–1736.

Mandiburdium, et Mandiburnium, in Charta Ottonis II. Imperat. ann. 980. apud Miræum tom. 1. pag. 655 :

Sub Mandiburnio et defensione succedentium Regum vel Imperatorum deliberatum est mansurum.... Sub defensione nostra ac Mandiburdio nostro sint, atque successorum nostrorum.

P. Carpentier, 1766.

Mundburdium, Defensio, tutela. Charta Odon. reg. ann. 889. inter Probat. tom. 2. Hist. Occit. col. 24 :

Quatenus ipsum locum in nostra defensione, cum omnibus ad eum pertinentibus, haberemus simul et defensione, sicut præcedentes reges comprobantur hactenus præceptorum indagine fecisse. Quod nos quoque audientes libenter eorum acquievimus consiliis, et præfatum cœnobium sub nostro Munburdio ac tuitione statuimus.

Vide in Mundiburdus.

Mundburgum. Withredus Rex Cantuariorum in Judiciis cap. 2 :

Pacis Ecclesiæ, quod Mundburgum vocant, 50. solidorum esto compensatio.

Mundeburgium. Epistola Caroli Martelli 32. inter Epist. S. Bonifacii Archiepisc. Moguntini :

Bonifacius Episcopus ad nos venit, et nobis suggessit, quod sub nostro Mundeburdio vel defensione eum recipere deberemus... Proinde nos taliter visi fecimus ei roratam dare, ut ubicunque ubi et ubi ambulare videtur, cum nostro amore, vel Mundeburgio et defensione quietis vel conservatus esse debeat.

les Bénédictins de St. Maur, 1733–1736.

Mundoburdum, in Capitulari 2. Caroli M. ann. 802. cap. 20.

mundoburgium Ecclesiarum, in Capitulari 7. Caroli M. ann. 803. cap. 1.

Mundeburnium, et Mundiburnium, in Charta Ottonis II. ann. 980. apud Hermannum Stangefolium lib. 2. Annalium Circuli Westphalici pag. 201. et in alia apud Bartholomæum Fizen in Hist. Leodiensi pag. 275. Præceptum Chlodovæi Reg. Franc. ann. 496. (si tamen

genuinum) tom. 4. Gall. Christ. inter Instr. col. 125 :

Nostræ celsitudini tradidit et commendavit, ut sub nostra emunitate et Mundiburnio, nostrorumque successorum Regum semper maneat.

Charta Pipini Reg. ann. 765. apud D. Calmet. tom. 1. Hist. Lothar. col. 281 :

Sub Regum Mundiburnio in sæcula manere decerno.

Adde Chartam Henrici III. Imperat. ann. 1051. apud Tolnerum Histor. Palat. inter Instrumenta pag. 26.

Bundburdum, pro Mundeburdum. Diploma Alberti Regis Italiæ pro Monasterio Casauriensi in Tabul. MS. ejusd. Monasterii :

Idcirco hunc Bundburdum scribere jubentes, præcipimus, etc.

Mudburdum et Mundburdum. Charta Ottonis Imp. ann. 968. apud Ughellum tom. 7. pag. 1311 :

Si quis igitur confirmationis, præcepti, seu cessionis Mudburdi violator extiterit, etc.

Adde pag. 1334.

les Bénédictins de St. Maur, 1733–1736.

Mumburdum. Charta Hugonis et Lotharii Reg. Ital. ann. 943. apud Eccardum in Origin. Habsburgo-Austr. pag. 154 :

Recipimus insuper prætaxatam ecclesiam cum sacerdotibus et clero nunc et in posterum inibi famulantibus sub nostræ tuitionis Mumburdum.

Munburdum. Charta Caroli M. ann. 775. sæc. 3. Bened. part. 2. pag. 265 :

Præcipimus præterea præfatum monasterium... cum fratribus et monachis ibidem Deo famulantibus, sub nostræ tuitionis Munburdum omni tempore permanere.

Chronicon S. Vincentii ad Vulturnum lib. 1 :

Sub ipsius tuitionis Munburdum omni tempore pacata et quieta valerent persistere.

Adde pag. 675. 677. 694. etc. Testamentum Ademari Vicecomitis Scalensis et Abbatis Militis Monasterii Tutelensis :

Sunt autem Monachi in Munburdo Regis ad locum salvum faciendum.

P. Carpentier, 1766.

Munburgum, Eadem notione. Charta Hugon. reg. Ital. ann. 928. apud Murator. tom. 5. Antiq. Ital. med. ævi col. 940 :

Monasterium de Gazo... cum omnibus quæ dici vel nominari possunt ad eundem monasterium pertinentibus vel aspicientibus, pro Dei amore animæque nostræ remedium, sub nostræ tuicionis Munburgum defendimus et custodimus.

les Bénédictins de St. Maur, 1733–1736.

Mundibrium, in Charta Henrici Reg. Rom. ann. 1003. apud Marten. tom. 1. Ampliss. Collect. col. 363 :

Nostram suppliciter precata est clementiam, ut et nos ipsum locum cum suis pertinentiis in nostrum Mundibrium et defensionem, pro redemptione animæ nostræ susciperemus.

Mundiburdum. Donatio Rodulfi Comit. Turen. ann. 824. apud Baluz. Hist. Tutel. col. 309 :

Quemcumque de heredibus nostris vestra elegerit voluntas in Mundiburdo vel tuitione, etc.

Charta Caroli C. Imp. ann. 859. in Tabulario Abbatiæ Bellilocensis in Lemovicensibus num. 4 :

In nostra defensione et tutela seu Mundiburdo reciperemus.

Mundiburdium, in Charta Pipini Reg. ann. 764. apud Calmet. tom. 1. Hist. Lothar. col. 280. Præceptum Arnolfi Regis ann. 891. apud Marten. tom. 1. Ampliss. Collect. col. 238 :

Sub nostræ protectionis tutamine et Mundiburdio quiete persistere, Deique misericordiam pro nobis attentius exorare.

Joannes XVII. PP. in Epist. a Gretzero edita in Vita S. Henrici Imp. de Episcopatu Bambergensi :

Sit ille Episcopatus liber, et ab omni potestate extranea securus, Romano tantummodo Mundiburdio subditus.

Ditmarus lib. 2 :

Eandem Abbatiam Mundiburdio Etheldagi Bremensis Archiepiscopi subdidit.

Acta Murensis Monasterii :

Prædia sua sub censu legitimo illi contradiderunt, ea conditione ut sub Mundiburdio ac defensione illius semper tuti valerent esse.

Charta Henrici IV. Imp. ann. 1111. in Metropol. Salisburg. tom. 3. pag. 94 :

In Mundiburdium defensionis eos suscepi.

Ita rursum pag. 396. et in Bullario Casinensi tom. 2. pag. 7. Vide Joannem VIII. PP. Epist. 238. Roverium in Reomao pag. 29. Diplomata Belgica Miræi lib. 1. cap. 8. etc.

L. Henschel, 1840–1850.

Munboratio. Polypt. Irmin. Br. 9. sect. 268 :

Qui per chartam Munborationem S. Germani habet.

◊ Mundiburdia dicta præterea ipsa Imperatorum ac Regum Diplomata, quibus Ecclesiæ ac Monasteria in eorum Mundiburdio, seu tuitione ac defensione ponuntur : ut apud Ughellum tom. 2. pag. 569. 645. 708. tom. 7. pag. 1311. 1334. et alios. Papias : Mundiburdia, Regum vel Principum sunt præcepta. Quo spectant ista ex Vita S. Hermelandi Abb. :

Si autem pro parvæ retributionis intuitu Monasterium ædificare desiderat, hortor ut regalibus eum manibus tuendum committat, et ut Regis clementia talem præceptionem facere dignetur, ut nulla alia potestas maligno instigatus spiritu, omni dominationis occasione sublata, molestiam habitantibus in eo ingerere audeat, quatenus Regali defensi præsidio, pro ejus totiusque sui Regni pace, libere, remota pravorum impulsione, Christi interpellent clementiam.

les Bénédictins de St. Maur, 1733–1736.

Munburnare, Tueri, regere. Charta ann. 1264. tom. 2. Hist. Eccl. Meld. pag. 166 :

Mittent duos fratres ecclesiæ suæ in dicta domo ad servandum et Munburnandum domum prædictam et omnia bona ipsius.