NECTAR, Vinum pigmentatum, Ugutioni. Joh. de Janua addit : Dulcis liquor. S. Ambrosius de Bono mortis cap. 5 :

Hinc Nectar illud ex vino et melle prophetico.

Rochus le Baillif in Dictionario Spagyr. :

Nectar sit ex vino rubeo coagulato et ex vino albo.

Potionis delicatioris species, interdicta in Statutis Ord. Cartusiensis ann. 1368. 2. part. cap. 5. § 30 :

Nectar quoque aut quaslibet alias vini et speciorum confectiones nullo unquam tempore in refectorio ministramus.

Tabularium Carrofense :

Et ipsi Monachi præfati Cœnobii afferant illis gantos unos, et duos cereos, cum duobus botis Nectare plenis, etc.

Vetus Ordinarium Cabilon. a Martenio laudatum pag. 77. Tractatus de ant. Eccl. Disciplina in divinis Offic. celebrandis :

His octo diebus (postremis Adventus Domini quibus totidem Antiphonæ O. in Ecclesia Cabilon. canebantur) post Vesperas... venit chorus in refectorio ordine processionali, duobus ceroferariis præcedentibus ; et interim sonatur campana grossa, et datur ibidem potus de Nectare et de vino.

Hujus consuetudinis rationem reddit Ordinarium Namnet. his verbis :

Item bibitur cum illo, qui incipit Antiphonam, ad significandum quod sitis antiquorum refrigata est per adventum Christi.

Aliis quoque diebus in quibusdam Ecclesiis Nectar distributum fuisse, quod postmodum in pecuniam commutatum fuit, nos docent Statuta Eccl. Barchinon. ann. 1332. apud eumdem Marten. tom. 4. Anecd. col. 613. ubi :

Item volumus.... quod Præpositi dictæ sedis, et quivis alii, qui Canonicis ejusdem Ecclesiæ Nectar et nebulas dare consueverunt et debent, dent et dare teneantur cuilibet Canonico, in festo Paschæ resurrectionis Domini inclusive usque carnisprivium Adventus Domini exclusive, scilicet in festivitatibus et diebus ejusdem temporis, in quibus Nectar et nebulæ Canonicis ministrantur, pro eodem Nectare et nebulis xii. denarios monetæ Barchinonensis decerno. Item fiat officialibus et Ministris ejusdem Ecclesiæ, et aliis quibus Nectar et nebulæ dari consueverunt et debent, juxta ratam perceptionis ipsarum,

f. ipsorum. Vide Pigmentum.