Nortmani, pro Gentibus Septentrionalibus. Aimoinus libro 1. de Miracul. S. Germani cap. 1 :

Gens Danorum, qui vulgo Nortmanni, id est, Septentrionales homines appellantur.

Chronicon a Pipino usque ad Ludovicum VII :

Dani Suevique, quos Theotisci Norman, i. Aquilonares appellant, etc.

Guillelmus Apuliensis lib. 1. de Gest. Normannor. :

Hos quando ventus, quem lingua soli genialis

North vocat, advexit Boreas regionis ad oras,

A qua digressi fines petiere Latinos :

Et Man est apud hos, Homo, quod perhibetur apud nos :

Normanni dicuntur, id est, homines Boreales.

Chronicon Magdeburgense MS. ex Bibl. S. Germani Paris. ann. 952 :

Dani siquidem ac Sueones, quos Normannos vocamus, Septentrionale littus, et omnes in eo insulas tenent.

Mox :

Dani et Sueones, cæterique trans Daniam populi ab Historicis Francorum omnes vocantur Nordmanni.

Willelm. Brito lib. 8. Philipp. :

Qua prius antiquum cum Neustrio nomen haberet,

Post a Normannis habuit Normannia nomen,

Quo gaudent patrii memores idiomatis esse,

In quo North, Boreas, homo Man sonat : inde vocatus

Normannus priscæ meminit patriæque tribusque.

Hermoldus Nigellus in Poemate de Ludov. Pio :

Nort quoque Francisco dicuntur nomine Manni

  Veloces, agiles, armigerique nimis.

MS. :

Mant en Engleiz et en Norroiz,

Senefie home en Franchois,

Ajoûtez ensemble Nort et Mant,

Ensemble dites donques Normant,

C'est honz de North en Romanz,

De la vint le nom as Normanz.

Vide Cluverium lib. 3. German. antiq. cap. 41. extr.