NOTORIA, Epistola, qua aliquid Principi aut Magistratui notum fit. Trebellius Pollio in Claudio, ex Epistola ejusdem Claudii :

Nihil me gravius accepit, quam quod Notoria tua intimasti, Claudium parentem amicumque nostrum insinuatis sibi falsis plerisque graviter irasci.

In Glossis Isidori, Notoria, elogium, textum malorum dictorum, quod Notoriam dicunt, appellatur : scilicet libellus accusationis, sic dictus, quod in eo reus notetur. Ita usurpat Augustinus Epist. 159 :

Qui non accusantibus nostris, sed illorum Notoria, ad quos tenendæ pacis vigilantia pertinebat, præsentari videntur examini.

Idem Epist. 160 :

Præmissa Notoria, ad judicia legesque perduxit.

Adde leg. 7. Cod. de Accusat. (9, 2.) Apuleium lib. 7. Paulum JC. etc. et quæ observant Marcilius ad Sueton. in Tito, Juretus ad Symmachum lib. 10. Epist. 4. Jacobus Gotofredus in leg. 31. Cod. Th. de Episcopis, (16, 2.) etc. Vide Notaria 1.