NOVITII, Qui in Monasterio religiosæ vitæ experimenta subeunt, et probationis elapso tempore, si idonei fuerint inventi, ad professionem admittuntur. Conventus Aquisgranensis ann. 817. cap. 34 :

Ut Novitio non facilis in Monasterium tribuatur ingressus.

Guigo I. Prior Portarum Epist. 3 :

Incipientes, quos Novitios vocant, etc. Novitii ad religionis conversationem conversi,

apud Orderic. Vitalem lib. 3. pag. 477. Novitiorum porro diversitatem observare est ex Udalrico lib. 2. Consuet. Clun. cap. 1 :

Aliqua diversitas est eorundem Novitiorum : nam non solum absque habitu veniunt, ut Laïci et Clerici, sed etiam cum habitu, et Monachi jam facti : et tales trifariam sunt differentes. Quidam sunt de longinquis et alienis Monasteriis, et ad hoc veniunt, ut rursum profiteantur, et de cætero maneant nobiscum. Quidam de cellis nostris, et vel pro infirmitate, vel loci longinquitate benedictionem jam a D. Abbate acceperunt, professione interim dilata, et ad nostrum locum usque reservata. Quidam sunt de tali Monasterio nostro, quod absque D. Abbate proprium habent Abbatem, ubi et si benedictionem accipiant, et professionem faciant, tamen habentur a nobis per omnia in vita et post vitam, ac si apud nos fuissent : et isti cum primum venerint, fiducialiter et absque mora, intrant, et secundum tempus, quo in præfato Monasterio sunt recepti, hic etiam ordine suo non carebunt. Reliqui omnes non permittuntur intrare, nisi prius juxta verbum S. Benedicti vel unam noctem in hospitio morentur ; prius quoque, quam intraverint, instruendi sunt, quemadmodum faciant petitionem suam, etc.

In eodem porro Conventu Aquisgranensi, ut Novitius

nec tondeatur, nec vestimenta pristina, immutet, priusquam obedientiam promittat

, præcipitur. Vide Formulam 32. ex Baluzianis, Haeftenum lib. 4. Disq. monast. disq. 1. et Acherium ad Vitam S. Lanfranci pag. 19.