OBLIGATORES, Qui ligamentis magicis ad morborum sanationes utuntur, in Capitul. Caroli M. lib. 1. cap. 64. 62. Adde Capitul. 1. ejusdem Imper. incerti anni cap. 40. Apud Apuleium lib. de Herbarum virtutibus cap. 15. n. 3 :

Si quis ad mulierem non poterit affectari, Obligatus.

Id est, maleficio et veneficio incantamentoque alligatus, detentus, devinctus et impeditus, quominus affectetur, id est, afficiatur, commoveatur, stimuletur, et accendatur ad cupiditates et libidinem veneris. Exemplum hujuscemodi obligationis præ cæteris profert Guibertus lib. 1. de Vita sua cap. 11. 17. Vide Ligaturæ, et Grimm. Mythol. Germ. pag. 630.