OBSONIUM, Convivium : nam Obsonia, i. panis. Ita Glossæ MSS. ad Alexandr. Iatrosoph. Interdum capitur hæc vox pro procuratione, seu convivio, quod vassallus domino debet. In Charta sub Roberto Rege Franciæ ann. 1023. exarata ex Tabulario S. Vedasti Atrebatensis :

Ab Ecclesia autem Episcopali juri nullam consuetudinem persolvendam statuimus, vel statui permittimus, nisi ut in Synodo denarii octo pro Obsonio in anno persolvantur.

Vita S. Gerardi Abbat. Broniensis num. 16 :

Et Ecclesia Broniensis ab omni Obsonio Episcopis Leodiensibus debito ulterius immunis habeatur.

Charta Samsonis Archiep. Rem. ann. 1148. e Chartul. S. Quintini in Insula pag. 40 :

Sane ipse Presbyter a sonniaticis seu Obsoniis et exactionibus, quæ plerumque ad Episcopi servitium fiunt, liber erit.

Alia Lamberti Episc. Noviom. ann. 1122. ibid. pag. 40 :

Somniatas sive Obsonia et quasdam exactiones quæ... ad nostrum servitium fiunt, etc.

Intelligo pecuniam pro Obsonio seu procuratione solutam Episcopis, ut in Charta Nicolai Camerac. Episc. ann. 1142. apud Miræum tom. 1. pag. 531. et in Instrum. tom. 4. Gall. Chr. col. 296 :

Altare de Tournicourt, cujus Obsonium per singulos sunt annos quatuor denarii.

Occurrit alibi non semel.