2. OLEA. Papias : Olea, gemma, barbarum est : ex fulvo et nigro, viridique et candido constat. Nescio an de hac Olea intelligendus sit Anastasius in Leone IV. PP. pag. 188 :

Et super illud Ciborium fecit Oleas, quæ pendent in circuitu altaris habentes tabulas quatuor exauratas, necnon et gammadias numero quatuor.

Ibidem pag. 196 :

Obtulit tres Oleas masoricas, admirabilis pulchritudinis, serico textas, coloreque depictas, quæ videlicet festis diebus in circuitu altaris majoris dependerent.

Certe cum solidum quid fuerint Oleæ, quæ in circuitu Ciborii dependerent, haud absonum videtur existimare fuisse grandiores gemmas, aut quid simile in gemmæ grandioris orbiculatæ figuram, atque adeo ex murrhina materia : quod non modo suadent vox masorica, quæ idem valet ac murrhina, sed et colores Oleæ, quibus murrham constituisse scribit Plinius lib. 37. cap. 2. nam quod

serico textæ oleæ

dicuntur Anastasio, error est forte librarii, ita ut legendum sit serico tectæ.