ORGIA, Mysteria Christianæ religionis, accersita voce a profanis Gentilium Orgiis seu Bacchanalibus aliisve sacris, de quibus inter alios Servius ad Virgilium lib. 4. Æneid. v. 302. Fridegodus in Vita S. Wilfridi Episcopi cap. 7 :

Fœdere consorti servabant scitaque vulgi,

Ardentes animis subdi cælestibus Orgiis.

Et cap. 12 :

..... Dum tensis alta pererrant

Marmora Psalmigraphi recolentes Orgia velis.

Preces, ut planum omnino videtur, significat apud Anastasium Bibl. in Epitome Chron. Casin. tom. 2. Muratorii pag. 362. col. 2 :

Sedem apostolicam protege, Romanum imperium, et hos gloriosos Patricios, corpore tibi simul et mente prostratos ab hostibus visibilibus et invisibilibus defende, et Christo pro omnibus Orgias funde, quatenus heic et in æternum omnes tuo munere lætemur.