1. PALLA, Globus, nostris Bale, Italis Palla et Balla, Germanis, Ballen, pro Pila. Addit. ad Vitam S. Antonini tom. 1. Maii pag. 349 :

Dum luderet ludo pilæ inflatæ quæ dicitur Palla grossa, fregerat sibi brachium.

Hesychius :

Πάλλα, σφαῖρα ἐϰ ποιϰίλων νημάτων πεποιημένη.

Ita porro Globum crucigerum Imperialem, qui inter Regalia insignia reponitur, appellat Gotefridus Viterbiensis :

Aureus ille Globus Pomum vel Palla vocatur,

Quando coronatur, Palla ferenda datur.

Infra :

Crux et Palla simul pariter connexa tenentur ;

Hæc ferit, hæc sanat, hæc perit, illa manet.

Versus aliii in Chr. MS. Andreæ Danduli ann. 1130 :

Crux, ensis, sceptrum, corona, lancea, Palla.

De ejusmodi globis crucigeris pluribus agimus in nostro Syntagmate de Numismatibus Imperator. Constantinop.