3. PLICA, Morbi genus, in Vita B. Ladislai apud Papebroch. tom. 1. Maii pag. 603 :

Plica, lingua nostra vernacula Gozdziec, morbus ille vocatur. Malum et virus hoc, non modo circa capillos, sed et in venis, nervis, musculis, carne et ossibus hærens, vehementer homines cruciat et torquet ; ossa interdum non solum loco movet, sed etiam in partes minutas confringit ; grassatur perniciose per omnia membra, cibos grossiores respuit, delicatos potus interdum solos admittit ; alias ad pugnam paratus maximorum dolorum gignit materiem, universaque viscera corporis cruciando depopulatur, artuum quoque penetrat intima, plena doloris ingerens vestigia ; in Russiæ potissimum provinciis omnibus perniciosa parturit germina.

Occurrit iterum in Mirac. B. Kingæ tom. 5. Julii pag. 755. ubi Sollerius notat sub finem sæculi 16. hunc morbum observari primum cœpisse.