PORTATIO Armorum, Eorum instructus et gestatio, Gall. Port d'armes, inter supremi dominii jura ita recensetur, ut majori etiam justitiario, nisi illud ab antiquo habeat, de delictis in hanc rem commissis, non liceat cognoscere aut judicare. Transactio inter Philippum Pulcrum Reg. Franc. et Episcopum Capitulumque Eccles. Vivar. ann. 1307. ex Schedis Cl. V. Lancelot :

Gentes nostræ dicebant et asserebant nos in civitate Vivarii, et terris dictorum Episcopi et Capituli... habere jurisdictionem temporalem, resortum, Portationem armorum et coercionem eorum, regalia, superioritatem, et alia quæ ad jus pertinent principatus.

Infra :

Arma Portare infra terram, et jurisdictionem suam mediatam vel immediatam, poterunt dicti Episcopus et Capitulum.

Litteræ Philippi V. Reg. Franc. ann. 1319. tom. 1. Ordinat. pag. 698. num. 18 :

Volumus etiam, et de gratia concedimus speciali, quod Senescalli nostri, prædicti, ceterique officiales nostri prædictos Nobiles altam habentes justitiam, Delatores armorum, occasione criminum et excessuum aliorum, quam ipsius Delationis armorum, in eorum terris commissorum, punire permittant, quodque ab illis, a quibus emendas occasione Portationis armorum pro nobis levabunt Senescalli, vel officiales nostri, ipsas non exigant, nisi modo quo antiquitus fieri consuevit, quodque dictos Nobiles ad quos ab antiquo cognitio et punitio Portationis armorum pertinent, non impediant quo minus de hoc uti possint, impedimento quocumque cessante. Portatio armorum prohibitorum,

in Constit. Jacobi Reg. Siciliæ cap. 53. Vide supra Portamentum.