1. PRÆSIDIUM, Peculium, pecunia, bona, facultates, etc. Auctor Queroli :

Ergone manibus meis Præsidium paternum ut efferrent de domo, etc.

Supra :

Fures mihi ac prædones cui bono ? ut si quid tibi spei aut Præsidii est, totum auferant.

Rursum :

Præsidium abstulisti, et cineres abdidisti.

Formula 33. inter Andegav. :

Casa sua per nocte fuit effracta, et omnes Præsidios suos, aurum, argentum, æramentum, vestimentum, utensilia, pecunia, seu strumenta cartarum quamplurimas.... fuit deportata.

Quid eo loci nomine Præsidii intelligendum sit haud obscurum est ex Marculfi Append. form. 46. quæ eadem de re sic habet :

Casa sua cum omni mobili, vel intro domo compendia, seu et strumenta chartarum, etc.

Vita S. Desiderii Episcopi Cadurcensis cap. 18 :

Inter cætera vero, et ad locum in seriem testamenti ita posuit : De Præsidio, inquit, meo vestimenta, scamnalia, mensalia, et electubilia, aurum vel argentum,... dono, etc.

Vetus Charta exarata ann. 3. Childeberti Regis in Tabul. S. Germani de Pratis :

Sed et omnia, quæ de Præsidio meo in die depositionis meæ inventum penes me aut repertum fuerit, hoc est aurum, argentum, vestimentum, vel prædia, etc.

Placitum Childeberti III. Regis, editum a viro doctissimo Joanne Mabillonio :

Farinariis, gregis cum pastoribus, Præsidiis, mobilebus, et immobilebus, etc.

Primum Testamentum Widradi Abbat. Flaviniac. :

Libros vel vestimenta Ecclesiæ, vel omne Præsidium, quod mihi legibus vivens possidere videor.

Paulus Bernriedensis in Vita Greg. VII. PP. cap. 57 :

Quidquid vero sui juris olim esse poterat, populus postea adveniens distraxit, turribus ac domibus subversis, Præsidiis vero fisci titulo sociatis.

Utuntur Marculfus lib. 1. form. 12. lib. 2. form. 7. 10. Formula 7. et 28. ex Baluzianis, Gregorius Turon. lib. 6. cap. 4. lib. 9. cap. 20. Halitgarius Cameracensis Episc. in Pœnitentiali cap. 4. Nicolaus I. PP. Epist. 40. Charta Leotheriæ tom. 2. sæculi 3. SS. Ord. S. Bened. pag. 615. Historia Episcopor. Bremensium pag. 122. etc. Vide Bignonium ad Marculfum.