PRIMITIARE, Incipere, primitias dare. Petrus Blesensis Epist. 20 :

Munificentiam a tenera Primitiavit ætate.

Adde serm. 21. Vita S. Patricii tom. 2. Mart. pag. 548 :

Prope erat Pascha,.... in quo vita mortua ex mortuis resurgens Primitiavit et Probavit resurrectionem mortuorum.

Elmham. in Vita Henr. V. Reg. Angl. edit. Hearnii cap. 79. pag. 229 :

Ante matutinalis favoris graciam, affuit alicujus temporis permissiva licentia, quo suos Primiciare temptarent insultus, aut scalas inicerent in mœnium summitates.

Inscriptio in Basilica S. Pauli Romæ, apud Panvinium de 7. Basil. pag. mihi 100 :

Hoc opus arte sua, quem Romæ Cardo beavit

Natus Capua Petrus olim Primitiavit.

Henricus Aquilonipolensis in Adolpheide cap. 14 :

Presbyter hinc factus Missam celebravit in ipsa,

  Gregorii luce Primitiando suam.

Vide Initiare.