PROMOTIVUS, Rem promovens et efficiens. Charta ann. 1337. apud eumdem Rymer. tom. 4. pag. 737 :

Specialiter vos rogamus quatinus vos partes vestras versus præfatum dom. vestrum Regem.... interponere velitis cum efficacia Promotivas, ut memor suæ promissionis, etc.

Litteræ ann. 1403. apud eumdem tom. 8. pag. 305 :

Vestra serenitas dignetur attentius audire, nostrosque subditos pauperes sub alis defensæ regalis tueri auxiliis Promotivis, ne tam damnabilem jacturam suarum rerum incidant et incurrant.

Elmham. in Vita Henrici V. Regis Angl. edit. Hearnii cap. 31. pag. 76 :

Quæcumque Imperatori (Sigismundo) sive suis in complacentiam cedere possent,... seu aliis quantumcumque preciosis, in ipsorum gaudia seu solacia Promotivis, ipsis a Regis famulis... ministrantur.