De Prosecutoribus, qui Gallice vocantur Poursuivants. Ulterius et post prædictos equitantes (de quibus in voce Chevaucheurs) alii nuncii habentur, qui Prosecutores appellantur, qui ex prædictis equitantibus post exercitium triennale in arte equitandi ad negotia creantur, certa solennitate adhibita. Creari autem debent Prosecutores non in minori festo quam in die Dominica, hoc modo. Aliquis Haraldus armorum tunica Domini sui indutus, præfatum creandum in manu sinistra ducens, et unum ciphum aqua et vino plenum in manu dextera tenens, accedere debet ad præsentiam Domini vel Magistri ipsius creandi, a quo in præsentia multorum testium ad hoc vocatorum petere debet, quo nomine vult ut Prosecutor suus nuncupetur. Quo nomine a dicto Domino vel Magistro dato, dictus Heraldus vocabit suum creandum illo nominc, projiciens partem ipsius aquæ super caput creandi..

Tunc accipiet tunicam Domini præfati creandi, et ponet super caput creandi ex transverso, ita quod illa pars tunicæ quæ ordinatur pro brachiis, ponatur ante et retro, quod pars largior præfatæ tunicæ supra brachia creandi ex utraque parte pendeat. Et sic præfatus Prosecutor novus uti debet tunica armorum, cum eam aliquando induat, semper, et non alio modo, quamdiu fuerit Prosecutor.

Sequitur jam juramentum, quod ipse novus Prosecutor præstabit immediate post suam creationem in præsentia antedicta, Haraldo sic dicente : Tu eris fidelis Domino, sive Magistro tuo qui te nominavit, in perpetuum, quacunque fruaris dignitate. Item Domino Regi, et cuicunque nobili licet hosti ; item negotia quorumcunque nobilium licet hostium fideliter exequeris, et cum inter hostes interrogatus fueris, tantum ad interrogata fideliter respondebis nihil novi eis intimans : honestatem tuam et officii tui usque ad mortem conservabis, erisque obediens cunctis Armorum Haraldis, ubicunque deveneris ; sic te Deus adjuvet et sancta Crux Dei.... Et est sciendum quod tales nuncii Prosecutores possunt esse Milites, et Militaribus gaudere insigniis, ut deauratis uti, veluet, et aliis pannis aureis indui ; non tamen sicut Nobiles. Et tales vocantur Milites linguares, quia eorum præcipuus honor est in custodia linguæ. Et quomodo isti tres officiarii præcedentes (Cursores, Equitantes, et Prosecutores) portabunt arma sive scuta suorum dominorum, patet per hos versus :

Cinctorio scutum dicas deferre Pedinum,

(i. Cursorem)

Sic equitis dignum fert scapula dextera signum,

(i. le Chevaucheur)

Sed humero lævo detulit Prosecutor ab ævo :

At Haraldorum stat pectore fons titulorum.