PYROCARÆ, Mulieres, quæ castitatem et cælibatum profitebantur, quas sua ætate, in Italia nempe, exortas testatur Joannes de Deo Doctor Bononiensis in Pœnitentiario edito a Jacobo Petito lib. 11. cap. 13. et quem ille conscripsit ann. 1247. ubi de pœnitentiis mulierum :

Si autem fuerint Pyrocaræ, quæ de pulvere nuperrime surrexerunt, gravabis eas jejuniis et orationibus, injungens eisdem, ut non de cætero sub specie pietatis (et) religionis impietatem pallient ; sed viros accipiant, si votum solemniter non fecerint, vel castitatem servent, quam Deo promiserunt.

Ejusmodi fuere Beghinæ nostrates. Vide Pinzochia et Pizocata.