QUADRANTALE, Amphora, mensura. Papias. Festus Pauli :

Quadrantal vocabant antiqui, quam ex Græco ἀμφορέα dicunt, quod vas pedis quadrati octo et quadraginta capit sextarios.

Vox hac notione usurpata Plauto et Catoni, quorum locos refert idem Festus. Bene Prateius :

Amphora Græcis dicitur id quod Latini Quadrantal appellant, Festus lib. 15. Est autem vas cujusvis materiæ, duarum urnarum capax, figura, cubi, rei cujusvis capiendæ. Quantum autem capiat vini, docet his verbis Volusius Mœtianus, juris auctor. Quadrantal, quod nunc plerique Amphoram vocant, habet urnas duas, modios tres, semodios sex, congios octo, sextarios 48. heminas 96. quartarios 192. cyathos 570.

Tum addit idem Prateius :

In eo quod ait, urnas duas, convenit cum Columella lib. 20. cap. 20. In eo quod scribit sextarios 48. consentit cum Festo.

Proprie Quadrantal cubum significat, unde cubicum vas ita dictum. Gellius lib. 1. cap. 20 : Quadrata undique, quæ ϰῦϐος illi, nos Quadrantalia dicimus. Glossæ Lat. Gr. Quadrantal, ϰῦϐος. Et mox : Quadrantale, ϰεράμιον. Alia Gr. Lat. : Κῦϐος, Quadrantal, Albeus. Et alibi : Κεράμιον, Orcium, Amphora, Quadrantale, Urceus. Vide Lexic. Hofmanni.