QUADRIPORTICUS, Atrium quatuor porticibus circumdatum, ante ædium sacrarum vestibula, Græcis τετράστυλον. Anastasius in S. Symmacho :

Cantharum B. Petri cum Quadriporticu marmoribus ornavit.

In Dono :

Hic atrium B. Petri superius, quod est ante Ecclesiam in Quadriporticum magnis marmoribus stravit.

Adde eumdem in Leone III. pag. 121. 139. 142. Itinerarium Hierosol. :

Est piscina, quæ dicitur Siloa ; habet Quadriporticum, et alia piscina grandis foras.

Paulinus Nat. 9 :

Ecce vides istam, qua janua prima receptat,

Porticus obscuro fueraî prius obruta tecto,

Nunc eadem nova pigmentis et culmine crevit.

Ast ubi conseptum Quadrato tegmine, circa

Vestibulum medio reseratur in æthera campo,

Hortulus ante fuit, etc.

Infra :

Sed rursum redeamus in atria, conspice rursum

Impositas longis duplicato tegmine cellas

Porticibus, etc.

Fortunatus lib. 9. Poem. 15. de Atrio ædis sacræ :

Altior impluvium, Quadrataque porticus ambit.

Adde, quæ de ejusmodi quadriporticibus congessimus in Descr. ædis Sophianæ n. 20.