◊ A Quadriviis proprie dictis appellatum etiam Padi fluvii Quadrivium ab Auctore Chronici parvi Ferrariensis, apud Murator. tom. 8. col. 476. ubi sic describitur :

Pervenitur ad vicum Adrianum, ubi aquarum Padi Quadrivium reperitur. Nam dextra conjungitur Gauro per fluentum, quod dicitur Cavadicium ; sinistra facit fluentum, quod dicitur Silvus longus, quod paludibus Clugiæ jungitur. Antrorsum tendens a Quadrivio jam dicto cum Gauro intrat in pelagus.

◊ Sed recentioribus Scriptoribus proprie hac voce intelliguntur quatuor Mathematicæ partes, Annæ Comnenæ lib. 1. Τετραϰτὺς τῶν μαθημάτων. Ephræmius in Chronico de Nicephoro Blemmyde :

Τετραϰτύϰος διδάσϰαλος μαθημάτων

. Quadrifariæ Mathesis januæ, Senatori lib. 1. Epist. 45. Papias : Quadruvium, ubi quatuor viæ conveniunt. Inde quatuor artes, id est Arithmetica, Geometria, Musica, Astronomia, Quadrivii nomen acceperunt, quia se invicem complectantur et contineant, ut non bene unam noverit, qui alias non noverit, orbatusque uno videatur oculo. Ugutio : Arithmetica, Musica, Geometria, Astronomia quadam similitudine dicuntur Quadrivium, quasi quadruplex via ad sapientiam, unde Triviales dicuntur, qui docent vel student in trivio, sicut Quadriviales dicuntur, qui in quadrivio. Harum Arithmetica unitati, Musica binario, Geometria trinario, Sphærica seu Astrologia quaternario comparatur, ut est ἐν θεολογουμένοις τῆς ἀριθμετιϰῆς. Boetius de Arithmetica cap. 1 :

Prudentiæ nobilitas quodam quasi Quadrivio vestigatur.

Infra :

Multitudinem, quæ per se est, Arithmetica speculatur integritas. Illam vero quæ ad aliquid, musici modulaminis temperamenta pernoscunt. Immobilis vero magnitudinis Geometria notitiam pollicetur. Mobilis scientiam Astronomicæ disciplinæ peritia vendicavit.

Mox :

Hoc igitur illud Quadrivium est, quo iis viandum sit, quibus excellentior animus a nobiscum procreatis sensibus, ad intelligentiæ certiora perducitur.

Joann. Sarisberiensis lib. 1. Metalogici cap. 24 :

Mathematica Quadruvii sui rotis vertitur, alarumque vestigiis insistens, colores et venustates suas multiplici varietate conterit.

Adde cap. 3. 4. 12. lib. 2. cap. 10. Vita S. Isidori Hispal. num. 8 :

Si hoc libro in trivii eruditione Isidorum præditum cernes eloquentia, hic in Quadrivii investigatione perfectum admireris in Matheseos disciplina.

Vita MS. S. Florentii in Prologo :

Cum Rhetoricæ artis faceta urbanitas jam olim a nostri seculi usu recesserit, viri quoque Quadratæ facundiæ prædictæ dudum cultores artis nostri duntaxat idiomatis penitus exoleverint, etc.

Vide Quintil. lib. 2. cap. 5. ubi Oratio quadrata. Constantinus African. lib. 1. Commun. locor. medic. in prologo :

Oportet enim qui in hac arte (Medicina) primatum vult obtinere, dialecticæ et totius Quadrivii notitiam habere.

Gervasius Tilleberiensis MS. de Otiis Imper. decis. 3. cap. 114 :

Erat enim summe literatus in trivio, et Quadrivio potens et acutissimus, in Physica operosus, in Astronomia summus.

Ecclesia Lugdunens. adversus Joannem Erigenam :

Quadruvium regularum totius Philosophiæ,.... mundanæ doctrinæ Quadrivia.

Epitaphium Hugonis Medici apud Naudæum de Antiquit. Scholæ Medicæ Paris. pag. 34 :

Quadrivium docuit, ac totum scire reliquit

Anno milleno bis centum, sed minus uno.

Vide Wibertum in Leone IX. PP. Honorium lib. de Viris illustr. in Boetio, Petrum Damian. lib. 6. Epist. 3. Trilogium animæ part. 3. cap. 5. Baldricum Burguliensem pag. 259. 269. Thiotfridum Epternac. in prologo, Matth. Paris pag. 559. præterea Notas nostras ad Alexiadem. Chronicon Richardi Pictav. apud Marten. tom. 5. Ampl. Collect. col. 1173. Vitam B. Willelmi Abb. Hirsaug. sæc. 6. Benedict. part. 2. pag. 726.

◊ Godefr. a S. Vict. circa ann. 1170. in Rithm. :

Hujus quoque fluminis partes sunt bis binæ,

Quas vulgus Quadrivium nominat Latine :

Nomen hoc sortitæ sunt istæ disciplinæ,

Uno quod initio coeunt et fine.

Vide Dissert. D. Le Beuf tom. 1. pag. 87.

◊ Quadrivium etiam vocant quatuor virtutes cardinales, de quibus ita S. Hieronym. Ep. 25. cap. 1 :

Quatuor virtutes describunt Stoici, ita sibi invicem nexas et mutuo cohærentes, ut qui unam non habuerit, omnibus careat, Prudentiam, Justitiam, Fortitudinem Temperantiam. Quadrivium vel quadriga virtutum,

apud Flodoardum lib. 4. Hist. Remens. cap. 5. ex Hincmaro Remensi : Quadrifaria virtus, apud Senatorem lib. 6. Epist. 3. Quaternæ virtutes, apud Dudonem lib. 3. de Moribus et Actis Normann. pag. 128. Τετραϰτὺς τῶν ἀρετῶν, apud Constantinum in Basilio cap. 51. "Αρμα τῶν άρετῶν, apud Theophylactum Bulgar. Archiepisc. Epist. 26. Τετράγονος τὴν σοφίαν, apud Damascium in Vita Isidori Philosophi. Vita S. Rodoaldi num. 15 :

Nemo namque humanæ rationis Quadruvio ad plenum conquadratus sufficere probatur, etc.

Chronicon Laurishamense pag. 93 :

Virum omni virtutum genere Conquadratum.