1. QUÆSTOR, Questor, Creditor, qui ab alio rem creditam repetit, quærit. Capitulare Arechis Principis Beneventani, editum a Camillo Peregrino cap. 10 :

Quidam hominum versuta calliditate imbuti, propter obligationes vel debita, quæ fecerant, propinquioribus parentibus, qui juxta legem hæredes eorum futuri sunt, testamentum donationis ammittunt, ut Questores eorum creditas res facile perdant. Propterea decernimus, ut primi hæredes obligationes vel debita propinquorum persolvant, quod residuum fuerit de rebus eorum sibimet assumant.