QUARTAGIUM, Quarta pars vel vindemiæ, vel aliarum rerum, quam sibi contra jus asserebant domini feudales in tenentium suorum prædiis, agris, vel vineis. Charta Odonis Archiep. Rotomag. ann. 1262. apud Sammarthanos :

Molta sicca, estoublagia, servitia rusticorum, Quartagia, messeria, servitia vavassorum, etc.

In Charta ann. 1262. hic laudata Quarriagia habet Reg. 31. Chartoph. reg. ut dictum est supra in Quarriagium. Alia Guillelmi Majoris Episcopi Andegav ann. 1307. in Gestis ejusdem cap. 47 :

Quamdam impositionem seu exactionem, talliam vel collectalem, quam adjutorium, vel aide, sive Quartagium appellant, de bonis, rebus, possessionibus et proventibus suis Ecclesiasticis de novo exigere et extorquere conantur.

Alia ann. 1437. ex Tabulario Nantoliensi in Pictonibus :

Super quod nos vel ille aut illi, qui tempore vindemiarum nomine nostro Quartabant seu computabant salmas bastatas, seu quantitatem vindemiæ, quas vel quam ad domos suas deportabant, vel habito certo computo cum eisdem jus, quod nobis competebat seu partem vindemiæ prædictæ nobis solverent, prædicti Quartatores seu computatores per se vel per alium, vel per alios compulerant, vel coegerant alios mansionarios seu cohabitatores dictarum villæ et parochiæ ad solvendam sibi certam pecuniæ quantitatem, antequam permitterent eos ad domos suas suam vindemiam deportare : et quod Quartatores seu computatores nostri prædicti tempore vindemiarum, aut aliquo alio tempore, ratione Quartagii seu computationis salmarum et bastatarum, et quantitatis vindemiæ nullam pecuniam, seu dona, aut munera a prædictis mansionariis et cohabitatoribus non habuerant, etc.

In Tabulario Nantoliensi in Pictonibus ann. 1434. occurrunt crebrius voces, Quartatores, Quartare, Quartagium. Vide Carto 1. Quarta 6. et Quarto 7.