QUARTAROLA, Mensura frumentaria aut leguminum, apud Venetos, ital. Quateruola, misura come il quarto dello staio. Sanutus lib. 2. part. 4. cap. 10 :

Distribuitur etiam in die cuilibet ex stipendiariis antedictis fabæ, vel alicujus alterius leguminis quadragesima particula unius Quartarolæ, ad modum mensuræ Venetæ deputatæ. Et ut ex ea plena cognitio habeatur, sciendum est, quod quatuor Quartarolæ perficiunt unam quartam, quæ quidem quarta usque ad quartum numerum multiplicata, unum sextarium perficit Venetorum : et tria sextaria de Venetiis sunt una salma de Apulia, tam de legumine, quam etiam de frumento.