Redibentia, Idem quod Redevancia, Clientare munus prædiatorium, Gall. Redevance. Privilegium Johannis de Castellione Comitis Blesensis concessum Abbatiæ S. Johannis in Villeia Carnot. ann. 1265. e Schedis D. Lancelot :

Homines burgi S. Johannis sint immunes et quitti a talliis, exactionibus, corveis, costumis et universis Redibentiis.

Charta ann. 1293. apud Baluzium tom. 2. Hist. Arvern. pag. 297 :

In aliis vero terris non moventibus nec existentibus de dicto prioratu, et in quibus ipsa Priorissa non habet partem, feodum, costumam, nec Redibentiam aliquam, etc.

Charta Philippi Franc. Reg. pro Sororibus S. Claræ prope Pontem S. Maxentiæ instituendis ann. 1309. e Chartophylacio Regio :

Ipsæ Sorores ad præstationes et Redibentias vel quævis onera minime teneantur.

Charta Philippi Longi Franc. Regis ann. 1319. ex eod. Charthophylacio Regesto 98. charta 226 :

Que quidem costuma seu Redibentia, tam ad precium terre quam ad valorem annorum communium, indifferenter extitit estimata.

Adde Glossarium Lobinelli tom. 3. Hist. Paris.

Redibentia, Vectigal, tributum. Edictum Philippi VI. Reg. Franc. ann. 1329. tom. 2. Ordinat. pag. 36 :

Quod quilibet possit asportare de extra regnum nostrum ad nostras monetas libere aurum, argentum in massa et bilhonum ; et erit liber ab omni pedagio atque leuda, et quacumque alia Redibentia.

Literæ ejusd. Regis ann. 1333. ibid. pag. 91 :

Dummodo pedagia et alias Redibentias pro dictis rebus et mercaturis... præstari solita, et quatuor denarios pro libra....... solverent gentibus regis super hoc deputandis.

Redibita, Idem quod Redhibentia, Gall. Redevance. Chartularium S. Vincentii Cenoman. fol. 21 :

Odo de Plancifago Miles boscum suum..... dedit Deo et abbatiæ S. Vincentii in perpetuam eleemosynam possidendum, ad annuum tamen servitium sex denariorum Cenomanensium, pro omni Redibita ad ipsum spectante, ipsi vel mandato suo in Pascha annis singulis reddendorum.

Redhibitio, Redditio, apud Symmachum lib. 10. Epist. 36. Lex Longob. lib. 2. tit. 52. § 10. Carol. M. 37. Capitul. lib. 4. cap. 26. :

Omnis controversia coram Centenariis diffiniri potest, excepta Redhibitione rerum immobilium et mancipiorum, etc. i.

cum agitur de proprietate rerum, iisque alii restituendis. Vide Regulam Magistri cap. 94. Concilium Audomarense ann. 1099. cap. 4. etc.

Redhibitio, Satisfactio. Miracula S. Bertini sæc. 3. Benedict. part. 1. pag. 129 :

Sollerti quoque priores cura cum senioribus consuluerunt, quibus potissimum occupationibus quivissent priorum negligentiarum Redhibitionem reddere.

Redhibitio, Mulcta. Lex Burgundion. tit. 49. § 4 :

Quod si... convictus fuerit, triplici Redhibitione teneatur obnoxius,

id est triplici compositione ; seu tripli Redhibitione, ut quadruplex Redhibitio, in Lege 10. Cod. Th. de Jure fisci. (10, 1.)

Redhibitio, Redibitio, Vectigal, tributum, præstatio. Charta Caroli Regis Franc. in Chronico Laurishamensi pag. 60. Cod. Laur. num. 5. tom. 1. pag. 14. ann. 772. :

Nec ad ullas Redhibitiones publicas requirendum, nex exactandum, quod ad partem fisci nostri exinde redhibetur, penitus ingredi judiciaria potestas, aut Missi nostri discurrentes non præsumant.

In Confirm. Ludov. ann. 852. ibid. num. 30. tom. 1. pag. 63 :

Aut ullas Redibitiones, aut illicitas occasiones requirendas.

Ita passim in veteribus Chartis sæculi viii. et seqq. unde emendanda Charta ann. 813. in Probat. novæ Hist. Occitan. tom. 1. col. 37. ubi perperam legitur Redititionem pro Redibitionem. Lex Longob. lib. 3. tit. 12. § 1. Carol. M. 121. :

Audivimus, quod juniores Comitum, vel aliqui Ministri Reipublicæ,... aliquas Redhibitiones vel collectiones... a populo exigere solent.

Capitularia Caroli C. tit. 6. cap. 2 :

Nec telonea... nec alia quælibet Redibitio, neque a Comite, neque a junioribus aut ministerialibus ejus deinceps ab illis (Ecclesiis) ullatenus exigatur.

Donatio Johannis Comitis Montis-fortis Parthenoni Portus Regii ann. 1248. apud Lobinell. tom. 3. Hist. Paris. pag. 86 :

Concedo... ccli. arpenta terræ... in perpetuum tenenda et possidenda, libera et quitta absque aliquo onere censuali, costuma, servitio et Redibitione,

hoc est, clientari munere prædiatorio, nostris Redevance : qua notione non semel occurrit alibi.

Redhibitiones annorum præteritorum

, in Histor. Miscella anno 9. Nicephori, quæ Theophani ὀπισθοτελείαι. Testamentum Ephibii Abbatis ann. 2. Reg. Childeberti :

In villis, vel terris, vel silvis, vel Redhibitionibus, etc.

Concil. Meldense ann. 845. cap. 63 :

Nec quisquam cujuslibet ordinis vel dignitatis exinde quidquam subtrahat, aut Redhibitionem quamcumque exigat temporalem. Redevabilité ou droiture,

in Magno Recordo Leodiensi pag. 66. Vide Redditio 2.

Redivitio, Eadem notione, in Præcepto Caroli Simplicis Regis Franc. apud Mabill. tom. 3. Annal. Benedict. pag. 697. col. 1.

Redibutio, Redditus, proventus. Capitulatio Caroli M. de partibus Saxoniæ ann. 809. cap. 16 :

Et hoc Christo propitio placuit, ut undecunque census aliquis ad fiscum pervenerit, sive in frido sive in qualicunque banno, et in omni Redibutione ad Regem pertinens, decima pars Ecclesiis et Sacerdotibus reddatur.

Vide Redebutio suo loco.

Redhibitus, Instauratus, restitutus. Interpres S. Irenæi lib. 5. cap. 14. num. 4 :

Memor igitur, dilectissime, quoniam carne Domini nostri redemptus es, et sanguine ejus Redhibitus, etc.

Redibitor, Ἀνάδοχος, in Glossis Lat. Gr. Aliæ Græc. Lat. : Ἀνάδοχος, Præs, Redibitor. Et mox Ἀνάδοχοι, Vades, rectores, vel potius Redibitores, uti legendum videtur. Redhibitor, qui rem venditam recipit, in lege 25. Dig. de except. rei jud. (44, 2.) Ubi Redhibitoria.