REFRIGERIUM, Locus ad refrigerandum aptus. Psalmus 65. 12 :

Transivimus per ignem et aquam : et eduxisti nos in Refrigerium.

Sæpius occurrit in Scripturis, idemque est quod Solatium, quies, saturitas. Vide Sap. 2. 1. et 4. 7. Isai. 28. 12. Jerem. 6. 16. Act. 3. 20. Refrigerium pauperum, in Epistola Justi Episc. tom. 2. Concil. Hispan. pag. 273.

Refrigerium et amœnitas loci,

in Chronico Novalic. lib. 2. cap. 5. apud Murator. tom. 2. part. 2. col. 703. Charta ann. 1228. apud D. Calmet tom. 2. Hist. Lothar. col. ccccxli :

Quotiescumque opus fuerit, homines Ducis in castro meo habebunt Refrigerium,

id est, Procurationem, pastum, cibum et potum, Gallis Rafraichissement. Utuntur etiam Tertullianus, vetus Interpres S. Irenæi pro Græco ἄνεσις, Orosius et alii Scriptores Ecclesiastici.