1. RELEVATUM, Reliquiæ ferculorum, quæ post prandium vel cœnam e mensa colliguntur pauperibus distribuendæ, Occitanis Relheu, Gallis Relief. Ordinatio Humberti II. ann. 1340. tom. 2. Hist. Dalphin. pag. 406. col. 1. ubi de distributione eleemosynarum :

Et nihilominus fragmentum vel Relevatum hospitii distribuatur die qualibet inter pauperes personas, prout legalitati eleemosynarii videbitur faciendum.

Transactio inter Abbatem et Monachos Crassenses ann. 1351. ex libro viridi f. 53 :

Residuum panum, quod superest, datur (pauperibus) amore Dei cum fragmentis sive Relheu, quod levatur de mensa monachorum in refectorio, et cum lo Relheu, quod debent recipere helemosynarii minores de aula abbatis... similiter vinum de Relheu reffectorii monachorum et aulæ dicti domini abbatis, cum lo Relheu scutellarum et aliarum rerum datur.

In foro Beneharnensi Relheu idem est quod Relevium, nostris etiam Relief.