◊ Passim occurrit pro quovis cujuscumque judicis districtu, non raro etiam pro suprema jurisdictione, supremo tribunali, ubi majores causæ dijudicandæ, ad quod a minoribus tribunalibus provocatur, et a quo non potest provocari, nostris etiam Ressort. Conventio Philippi III. Franc. Regis cum Canonicis S. Mederici Paris. ann. 1273. apud Lobinell. tom. 3. Hist. Paris. pag. 27. col. 1 :

Habebunt etiam dicti Canonici in hospitibus dictæ terræ et in dicta tota terra justitiam super mobilibus... item super verbis contumeliosis, alapis sive buffis, melleis sine sanguine.... nec nos, nec successores nostri in præmissis seu aliquo de præmissis aliquid de cætero reclamare ratione Ressorti (poterimus,) excepta, ut dictum est, justitia super ictibus orbis, vel aliis, ex quibus verisimile esset, vel etiam contingeret, quod percussus moreretur.

Litteræ Philippi IV. Franc. Regis ann. 1291. apud Marten. tom. 1. Anecdot. col. 1243 :

Conquestus est nobis dilectus et fidelis noster Comes Haynnoniæ, quod in terra sua de Ostrevanno, de qua nobis fecit homagium, sibi et gentibus suis ac subditis fiunt plura gravamina et indebitæ novitates : unde cum intentionis nostræ non sit in terra prædicta habere nisi homagium et Ressortum ; mandamus vobis... permittatis eumdem Comitem suosque subditos suis dominiis, feodis, justitiis et juribus uti et gaudere pacifice, eo modo quo eis gaudebant antequam de dicta terra ad homagium nostrum venisset, salvis nobis Ressorto et superioritate prædictis in ipsa terra.

Charta Edwardi I. Regis Angl. ann. 1296. apud Rymer. tom. 2. pag. 713. col. 1 :

Et etiam quod Senescallo Vasconiæ et aliis ministris nostris, ne de judiciis majoris et curiæ Baionæ, nisi per viam appellationis et Ressorti, se aliquatenus intromitterent.... inhiberemus.

Homagium domini castri S. Baudilii factum Abbati S. Victoris Massil. ann. 1296. ex Archivo ejusdem S. Victoris armar. Ruthen. n. 42 :

Faciamque proclamari nomen S. Victoris in signum supremi dominii et Resorti.

Vetus Inquesta de juribus Abbatiæ Beccensis MS. :

Vidit eos utentes in pluribus casibus de placito ensis, et ita fama communis tenet, præterquam de rapo, de focagio et Resorto.

Enumeratio jurium Castri Auzeti ann. 1394. e Regesto Cameræ Comput. Provinciæ signato Armorum fol. 70 :

Superioritate tamen regia, appellationibus.... Ressorto et homagio ligio et sacramento fidelitatis..... reservatis.

Arrestum Parlamenti ann. 1394. apud Menesterium in Probat. Hist. Lugdun. pag. 72. col. 2 :

Volens ipse controversias inter Franciæ Reges, Archiepiscopum et cives Lugdunenses.... subortas extinguere, jurisdictionem domaneriam dictæ villæ Lugdunensis, retento sibi et successoribus suis inter cætera jure superioritatis et Ressorti, ac cæteris juribus regalibus in eadem.... retento etiam sibi et suis successoribus prædictis Ressorto tam secundarum appellationum ab extra villæ Lugdunensis provenientium ad Archiepiscopum et Capitulum, quam primarum a judice ordinario Archiepiscopi in eadem villa Lugdunensi interjectarum Archiepiscopo Lugdun. etc.

Pluries recurrit ibi et alibi.