RETIARIUS, Ad rete pertinens, vel decipiens, vel qui retia facit, Johanni de Janua. Gloss. Lat. Gr. : Retiarius, λινοῦχος, διϰτυοπλόϰος, διϰτυοφόρος, διϰτυϐόλος. Adde Glossas Græc. Lat. in his vocibus. Retiarii Latinis dicti Gladiatores a rete, quod sub scuto gestabant, ut mirmillones, contra quos pugnabant, involverent. De his Quintilianus lib. 6. cap. 4. Suetonius in Claudio, Tertullianus de Spectaculis cap. 25. Festus, Isidorus lib. 18. Orig. cap. 54. Lipsius in Saturnalibus, Erasmus in Adagio, Contra Retiarium ferula : quod occurrit apud Juvenalem Sat. 8. et Martialem in Præfat. lib. 2. quodque dictum volunt in eos, qui infirmo præsidio contra maxime instructum pugnare præsumerent. De retibus in conflictu adhibitis vide Carolum de Aquino in Lexico Militari v. Retia.