REVERSIO Terrarum, etc. si late sumatur, est proxima successio post obitum ejus, qui præsenter possidet : sed si proprie, significat reditionem, quasi, aut circunductionem ad feoffatorem, aut ejus hæredes propter delictum feoffati, aut hæredum defectum. Ita Cowellus lib. 2. tit. 7. § 18. lib. 2. tit. 40. § 31. Charta Joannis Abb. S. Augustini Cantuar. :

Una cum omnibus et singulis maneriis, terris, tenementis, redditibus, Reversionibus, servitiis, etc.

Henricus de Knyghton ann. 1335 :

In eodem viagio Rex dedit domino Montagu is chrest with egle, cum uno dextrario strato cum armis de Montagu, cum Reversione manerii de Wetton,... quam Reversionem Dom. Joannes Montravers perquisierat de Dom. Roberto Fit-pain.

Vide Thomam Blount in Nomolexico Angl. Notit. ann. 35. Edward. I. Reg. Angl. North. rot. 45. in Abbrev. Placit. pag. 260 :

Dicunt quod illud verbum Reversio talis est naturæ, quod supponit ipsum, ad quem aut ad cujus heredem tenementa aliqua reverti debent, prius extitisse seisitum de tenementis, quæ debent reverti, cum non possunt reverti nisi ad illum in cujus seisina prius extiterunt, aut ad heredes suos.