SARTATECTUM, unica voce, interdum Sarta tecta, disjunctis vocabulis, Operum publicorum tuitio vel refectio. Glossæ Lat. Græc. : Sartatecta, ὑποραφθαί, leg. ὑποραφαί, vel ὑποῤῥαφίαι, ut vult Vulcanius. Glossæ Græc. Lat. : Ὑποράπτω οἰϰοδομήν, substruo, resarcio. ὑποραφή, plicatura, resarcinatio. Gloss. MSS. Reg. et Papias : Sartatectum, restauratio templi, reparatio fabricæ, Sartum enim, consutum dicitur. Gloss. MS. : Sartatecta, restauratio ædificii, vel interruptiones domus. Catholicon parvum : Sartatectum, vel sartitectum, Reparation de toit ou de temple, ou taille pour ce levée, in Gloss. Lat. Gall. Sangerman. Testamentum S. Remigii Remensis Episcopi :

Ita confirmo, ut Crusciniacus futuri Episcopi successoris mei obsequiis et Sartatectis principalis Ecclesiæ deputetur.

Lex 3. Cod. Th. de Calcis coctorib. (14, 6.) :

Vehationis medietatem, quam Sartis tectis jussimus deputari, separatim conveniet adscribi.

Capitularia Caroli C. tit. 6. cap. 63 :

Qui ex rebus Ecclesiasticis..... Sartatecta Ecclesiæ secundum antiquam auctoritatem et consuetudinem restaurare debent.

Charta ann. 862. apud Doubletum pag. 793 :

Et pro Sartatectis domorum atque operimentis, etc.

Capitula Walterii Aurelianensis Episcopi cap. 5 :

Ut nullus sacrum vas, aut aliquid Deo sacratum loco pignoris dare præsumat : nisi causa redimendorum captivorum, aut in restauratione Sartatectorum Ecclesiæ.

Ita usurpant Gregorius M. lib. 3. Epist. 19. lib. 4. Ep. 42. lib. 8. Ep. 1. lib. 12. Epist. 10. Anastasius in Vitis PP. pag. 117. 119. 121. 122. 127. 128. 131. 141. 142. 161. 206. Hugo Flaviniac. pag. 164. Additio 4. Ludovici Pii cap. 60. 84. etc.