Il avoit vendu ou fait vendre.... deux pieches de vin au prix de viii. deniers chacun lot, dont en appartenoit à iceulx demandeurs pour leur dit droit de tonlieu et forage de chacune pieche deux septiers, qui font quatre septiers, en chacun desquels septiers y a quatre lots mesure de la dite ville qui font xvi. lots qui valoient et valent audit prix de viii. deniers le lot la somme de x. sols viii. deniers. Et aussi avoit et a mis ou fais mettre ledit.... au devant et au dehors du lieu et maison là où il a fait vendre lesdits vins fœulle et verdure ou Charsell, parquoy estoit deub auxdits demandeurs pour leur dit droit de Cherssel deux sols. Ainsi estoient et sont en tout pour les dits droits de tonlieu, forage et Serchel la somme de xii. sols viii. deniers.