SIPHAC, vox Arabica, Medicis mediæ ætatis familiaris, pro Peritonio, seu panniculo tenuissimo, qui statim sub musculis reperitur, cui musculus transversus jungitur. Alias Membrana. Constantinus Afric. lib. 5. de Morbor. curat. cap. 5 :

Unde spatia inter intestina et pelliculam, quæ Syphac dicitur, implentur.

Ita lib. 6. c. 8. At Siphac scribitur lib. 5. c. 13. Utitur etiam Mundinus lib. de Anatomia, ut et Pseudo-Ovidius lib. 2. de Vetula, ubi de Semiviris :

Sive quibus solitis thalamos violare pudicos

Deprensis in adulterio genitalia membra

Iracunda manus sponsi violenter ademit ;

Sive quibus ruptura siphac ita magnificari

Cœpisset, quod non prohiberet in ostea casum

Intestinorum, etc.