SOMNUS Venereus : ita Medici Latini appellant quem Græci ὸνειρόγονον, cum scilicet per somnos inanibus visis affecti ægrotantes, seminis lapsu vexantur. Ita præter Plinium, a quo

Veneris somnum

appellatur, Cælius Aurelian. lib. 5. Chron. cap. 5. Adde in hanc rem insignem alium locum ejusdem egregii scriptoris ex lib. 1. cap. 3. pag. 22 :

At vero concubitus, sive venus, quam adhibendam probant, ab aliquibus parva Epilepsia nuncupata est ; siquidem similem faciat membrorum motum diverso contractu, anhelatione et sudore attestante, et oculorum conversione cum rubore vultus, ac deinde post effectum displicere faciat sibimet corpus cum pallore, et quadam debilitate vel mæstitudine, adeo nervos afficere videatur, ut sæpe imminente accessione per somnum jactu seminis ægri præpurgentur, quod Græci Onirogonon vocaverunt.