SPERMOLOGIUS, Spermologus, Qui serit verba, sermocinator, prædicator verbi. Glaber Rodulphus lib. 3. Hist. cap. 5 :

Hic tamen pater, scilicet Willermus... præscriptæ institutionis laboriosior ac Spermologius fructificatior est repertus.

Translat. S. Sebastiani, etc. sæc. 4. Bened. part. 1. pag. 399 :

Longum valde ac cuiquam Spermologo difficillimum est viritim ac personaliter ea prosequi.

Notkeri Balbuli lib. Sequentiarum apud Pezium tom. 1. Anecdot. part. 1. col. 29 :

Spermologon philosophos te, Paule, Christus dat vincere sua voce.

Liudprandi Legat. cap. 47 :

Qui in aliis rebus sæpe videor Spermologus et multissonus, in hac, ut piscis, videor insonus.

Ademar. Histor. lib. 3. cap. 56 :

Reliquiæ principis summi, qui pater est Aquitanorum et primus Galliarum Spermologus, videlicet beati apostoli Marcialis, etc.