1. STABILITA, æ, in Statutis Delphinalibus pag. 38. videtur idem jus quod Reseandisia ; quo scilicet dominus feudalis vassallum seu tenentem cogere potest, ut intra feudi sui terminos habitet aut mansionem habeat ; quod interdum pecunia redimebatur. Comput. Castellan. Viennens. ann. 1322 :

Die 27. Aug. computavit Albertus de villa de Stabilita quam tenuit apud Vezeron.

Charta ann. 1341. tom. 2. Hist. Dalphin. pag. 435. col. 1 :

Ipsos suos quoscumque subditos... a prædictis omnibus et singulis Stabilitis, focagiis, donis, liberavit, etc.

Alia ann. 1349. ibid. pag. 588. col. 1 :

Item quod nec ipsi homines, nec alii quicumque homines, seu subditi Dalphinatus, aut aliarum terrarum dom. Dalphini teneantur ad aliquas Stabilitas.

Comput. Castell. Graisivod. ann. 1348 :

Item solvit et deliberavit pro novem clientibus tenutis ultra numerum suæ Stabilitæ 18. sol.

Vide Residentia in Residentes.