SUBARMALIS, Subarmale, Vestis sic dicta, ut quidam putant, quod sub armis gestaretur, ut Turnebus lib. 18. Advers. c. 19. qui existimat fuisse crassum sagulum, quod sub armis induererur, ut eorum durities corpus minus offenderet, ut fuere Gambesones, quæ sententia arridet Octavio Ferrario, de Re Vestiaria 2. part. lib. 3. c. 17. Et certe Papias Subarmales fuisse ait tunicas subcinctas, id est curtas, quomodo fuere etiam gambesones. Spartianus :

Cum Romam Severus venisset, prætorianos cum Subarmalibus inermes sibi jussit occurrere.

Ex Herodiano et aliis, pacificum fuisse habitum, εἰρηνιϰὸν σχῆμα, quidam volunt : alii sic nuncupatam ejusmodi vestem opinantur, quod armis aptaretur, quemadmodum Armilausam dictam vult Isidorus,

quod ante et retro divisa atque aperta esset, in armos tantum clausa

. Utcumque sit, fuisse subarmalem vestem Ducum ac Tribunorum, satis prodit Valerianus Aug. in Epist. ad Zosimionem, qua Claudio etiamnum Tribuno dari jubet inter alia,

albam subsericam unam, cum purpura Succumbitana, Subarmale unum cum purpura Maura..... Hæc autem omnia idcirco specialiter non quasi Tribuno, sed quasi Duci, detuli, quia vir talis est, ut ei plura etiam deferenda sint

. Nec Ducum duntaxat, sed et Consulum fuisse propriam vestem, innuit idem Valerianus Aug. in Orat. pro Aureliano apud Vopiscum :

Cape tunicam palmatam, togam pictam, Subarmalem profundum, sellam eboratam : nam te Consulem hodie designo, etc.

Vide quæ observamus in Dissertat. de Nummis Imperatorum Byzantinor.