TANCHELMISTÆ sic appellati sectatores cujusdam Tanchelmi hæretici, qui et Tanchelinus, Tanquelmus, Tauchelinus, Tandemus, Tanderius et Landelinus pro variis scriptoribus seu librariorum socordia dictus est. Hic in Flandria sæculo xii. ineunte errores suos disseminare cœpit. Vita S. Norberti tom. 1. Jun. pag. 843. col. 2 :

Contigit ut hæreticus quidam, miræ subtilitatis et versutiæ seductor, Tanchelinus nomine, ibi adveniens, in eadem gente suæ seductionis locum inveniret. Erat denique omnium hominum sceleratissimus, et Dei et omnium sacramentorum ejus inimicus et totius religionis et Christianæ fidei contrarius, etc.

Vide ibi notam doctorum Editorum et Supplem. ad Miræum pag. 567.