THECLATURA, vel Teclatura, Cæsura, incisio in arbore, quæ vice termini est ; ejusmodi vero incisiones in arboribus, Eclats, et Eclatures, etiamnum vulgo dicimus ; vel certe incisionum avulsas particulas, quasi Teclatures. Edictum Rotharis Regis tit. 96. § 3. 242. et Lex Longob. lib. 1. tit. 26. § 3 :

Si quis liber homo arborem, ubi Theclatura facta est, inter fines discernendos, inciderit, aut deleverit, etc.

Adde § 4. 5. Charta Desiderii Regis in Bullario Casinensi tom. 2. pag. 14 :

Et deinde per ipsa via percurrentes per arbores Teclatos habentes literas Omega, usque in fossa Scaveriola, etc.

Mox :

Et de capite ipso perfossato de homines de vico Bedullio, per prato in stilo ficto, et pero (piro) Teclato, et per runco in furca ficta, usque in pero similis Teclato, deinde in stilo similis Teclata, etc. Ceclatura,

perperam, pro Theclatura, in Charta Rachisi Regis Longobardorum ann. 742. apud Ughellum tom. 3. pag. 671 :

Inde recte ad alia quercia, qui est circa semita, qui venit de Paliano, et vadit recte vico Lordoniano, et habet Ceclaturas, inde vero, etc.

Emendanda etiam Charta alia Friderici I. Imp. ann. 1153. in Bullario Casinensi tom. 2. pag. 172 :

Ac casale Domnino per circuitum per designata loca et Calaturas per circuitum, quos etiam terminos et fines eidem monasterio concedimus.

Ubi legendum Teclaturas, ut est editum apud Ughellum tom. 4. pag. 1291. Vide Grimm. Antiq. Jur. Germ. pag. 542.