TOLFFMYNING, Mensuræ species apud Danos, de qua sic Andræas Suenonis Archiep. Sundensis lib. 14. Legum Scanicar. cap, 1 :

Quandocunque indeterminatim agitur de mensura, illa debet intelligi, quæ rotunditatem æqualem amplectens, et orthogonaliter, et more catheti, per senam pollicis latitudinem a fundo consurgens, duplo majorem habet instar hypotenusæ altitudinem transversalem per virgam, quæ habens pollicis duodenum latitudinem in longitudine, ubicumque superponitur extremitati fundi ; qua parte conjungitur cum corona, per mensuræ medium transeundo, summitate sua contingit directe oppositam summitatem coronæ, ob quam altitudinem hanc mensuram Tolffmyning idioma patrium appellavit ;

ubi Cathetus, Græcis ϰάθετος, est perpendiculum, vel altitudo perpendicularis : hypothenusa vero, ὑποτείνουσα, nempe πλευρὰ Euclidi et Geometris vox familiaris, de qua consulendi Grammatici Græci, et Mathematici.