2. TORCIA, Torsia, Agger ad Ligeris ripas, quo hiemales fluminis exundationes comprimantur. Robertus de monte ann. 1169 :

Rex Henricus fecit fossata alta et lata, inter Franciam et Normanniam, ad prædones arcendos ; similiter fecerat in Andegavensi pago super Ligerim, ad aquam arcendam, quæ messes et prata prædabat, quædam retinacula, quæ Torsias vocant, per 30. fere milliaria, faciens ibi ædificare mansiones hominum qui Torsias tenerent : quos etiam fecit liberos de exercitu, et multis aliis ad fiscum pertinentibus.

Nicolaus Trivettus habet hoc loco Torcias. Hos aggeres, Turcies vocat Consuetudo Aurelian. art. 256. Confer Destorser, apud Raynouard. Glossar. Rom. tom. 5. pag. 384. Ita Padi accolæ illam terræ aggestionem, qua agros finitimos a fluminis eruptione defendunt, lingua patria Argines appellant, ex Latino forte agger. Capitula Caroli M. lib. 4. c. 10 :

De aggeribus juxta Ligerim faciendis, ut bonus Missus eidem operi præponatur.

Ita aggeres Nili dicuntur in Cod. Theod. tit. de Nili aggeribus (9, 32.), apud Sidonium lib. 5. Epist. 5 :

Publicarum molium objectus.

Huc referri debet, ut videtur, vox Torchiez, quam usurpat MS. :

Les aultres se sont embuchiez

Par vallées et par Torchiez.