TRANSENDA, Via, platea, qua transitur : sed proprie via strictior, Passage, unde Italis Transandare, transcurrere, prætergredi. Anastasius in Stephano IV. PP. pag. 94 :

Eumque projicientes in terra juxta Transendam campi Lateranensis, ejus effoderunt oculos.

Charta Landolphi et Atenolphi Ducum Longobard. :

Secus Transendam, quæ pergit ad portam Rufini.

Alia Pandolfi et Landolphi Ducum Longob. in Chronico Beneventano S. Sophiæ :

Concedimus in nominato monasterio S. Sophiæ ipsam Transendam, quæ vadit retro ipsam Ecclesiam, et quæ in parietibus ejusdem ecclesiæ conjuncta est.

Alia eorumdem Ducum ibid. :

Juxta plateam majorem illam publicam quæ ascendit de porta Summa, et juxta transendam publicam, quæ olim pergere videbatur erga ipsum prædictum monasterium, etc.

Diploma Roberti Regis Neapol. ann. 1321. apud Wadding. :

Item domus seu apothecæ... sitæ in civitate Neapolis in platea portus, intus anditus seu Transendam communem, et sunt conjunctæ cum prædicto anditu seu Transenda communi, sicuti paries exfiniat.

Adde Sanctuarium Capuanum pag. 643. Vide Andare.