TRAPEZETA, Monetarius. Jo. de Janua :

Trapezeta, vel Trapezita, nummularius, vel mensarius, qui pecuniam super mensam dinumerat.

Gloss. Lat. Gall. Sangerm. Trapezeta, changeur de monnoye. Gloss. Saxon. Wlfrici : Trapezita, vel monetarius, Mynetere. Gloss. Lat. MS. Reg. : Trapezeta, Nummularius, Mensularius. Gloss. Gr. MS. Reg. cod. 1673 : Κολλυϐιστής, τραπεζίτης. Diploma Caroli Simpl. ann. 915. pro Abbat. Trenorchiensi :

Concedimus quoque, ut Trapezetas locus prædictus habeat, qui nostri nominis signum singulis imprimant nummis, ne metallorum mixtura adesse valeat.

Eadem habentur in Chartis Rodulfi Reg. ann. 924. et Henrici I. Reg. ann. 1059. pro eodem Monasterio. Historia Translationis S. Sebastiani n. 43 :

Monetam etiam publicam incudibus, et Trapezetam perpetuo famulatu sacris ipsius deservituram subdidit.

Arnoldus Lubecensis lib. 2. cap. 40 :

Comiti Adolfo medietatem tributorum totius civitatis de teloniis, de molendinis, de Trapezitis, in beneficio dedit.

Notitia Viennensis monetæ, in Tabulario ejusdem Ecclesiæ fol. 25. de monetario, qui falsam monetam cuderat :

Tamen et omnibus notum fiat, Trapezeta a domno Leone IX. PP. excommunicatus, paralysi perculsus, membris omnibus dissolutus, impiam vitam digna morte finivit.

Vide lib. Miraculor. S. Vulfrani Episc. n. 13. et Rolandinum Patav. lib. 12. cap. 2. apud Muratorium tom. 8. col. 345. Guerard. in Proleg. Chartul. S. Petri Carnot. pag. 63.